Númberu 1 — La Vieya Asturies

L’asturianu entá nun ye llingua oficial, Cimavilla vendióse a los pisos turísticos y la Renfe sigue llegando tarde: esi ye’l retratu d’esti Númberu 1 de La Vieya Asturies, fanzine cómicu, satíricu y punk, escritu n’asturianu de la calle. La Vieya ye esa güela de gafes que too lo ve, que pega p’arriba y nunca p’abaxo, y que diz en voz alta lo que tol mundu piensa per lo baxo.

Tienlu equí embaxo en versión web, sección por sección, y el fanzine enteru en PDF pa baxar.

Asina que ya sabes: baxa’l PDF, imprímilu y repártilu de mano en mano, como mandó siempre la tradición. Pása-ylu al vecín, a la collacia y al cuñáu esi que diz que l’asturianu nun val pa nada. Compartir ye de bones persones; nun compartir, de pisapraos.

La portada: Oficialidá del asturianu ¡YA!

Abrimos a lo grande. Na portada, un señor con puru na boca berra lo de siempre: «¿Qué mierda ye esa del asturianu, vaya inventu de llaboratoriu? ¡Habla español, coño!». Y mientres berra, la Vieya da-y col matamoscas de la OFICIALIDÁ ata callalu.

Porque l’asturianu nin ye inventu nin ye de llaboratoriu: fálase en cada cocina, en cada chigre y en cada cuadra d’Asturies, y entá nun ye llingua oficial. Asina que la cosa ta clara:

Oficialidá del asturianu ¡YA!

¿Qu’osties faémos equí?

Esti ye’l manifiestu, y va curtiu pa que lu entiendan ata los de la corbata:

Asturies de mis pecaos. Mientres unos vendíen paraísu rural, otros marchaben porque nun había trabayu. Mientres unos falaben de modernidá, la Renfe siguía llegando tarde. Por eso vuelve La Vieya. Porque dalguién tenía que dicilo.

¡Llei el fanzine y calla la boca, ho! Si quies el manifiestu enteru, tienlu en ¿Qu’osties faémos equí?.

N’aldea

La sección del paraísu rural que te venden a precio de oru. Esti númberu trai’l pack «Torna’l pueblu» de 250 €, esi qu’unos espabilaos cuélgente como si fuera un favor:

—Sí, sí, ye’l pack «torna’l pueblu» de 250 €, vais gozalo, fíos.

Y los turistes, gozándolo, claro, delantre d’una boñiga entá humeante:

—¡Ooooh, cariñu, qué… qué olor tan rural y… eco-friendly! —S-sí… súper… auténtico…

Pa eso vienen de la ciudá: pa pagar 250 € por golela.

El Consultoriu

La xente escribe a la Vieya colos sos problemes y la Vieya respuende ensin pelos na llingua. Esti númberu trai dos cartes que dan pa too: una sobre un pisu en Cimavilla que namás ye pa turistes, y otra sobre un xefe que dixo qu’a la oficina con calor se va con abanicu de casa.

Lléiles enteres nel Consultoriu La Vieya.

Asturies en curtiu

L’actualidá asturiana, pasada pel matamoscas:

• Colapso nos trenes. Renfe anuncia que «llimpia les víes y pon madre n’Asturies». Retrasos pa tres llexislatures.
• Alerta por postureo en Salinas. Prohíbese la playa a quien lleve una tabla de surf más cara que’l coche.
• I+D en Cabueñes. Una máquina nuclear pa detectar carne nos cachopos.
• Funcionariu trabayando un vienres pela tarde. La investigación sigue abierta.
• La AEMET avisa de granizaes y riesgu d’incendios. La Vieya nin se inmuta.

Tienes toa la última hora en ¡Última hora!.

---

Y hasta equí’l Númberu 1. La Vieya nun perdona, nin a los de la corbata nin a los espabilaos de siempre. Sátira pa pisapraos, y a callar, ho.