Númberu 3 — La Vieya Asturies

Entama’l cursu políticu y la Vieya nun espera a nadie: sal na portada d’esti Númberu 3 tirando de la oreja a los dos de siempre, delantre de la Santina y con bandera asturiana al fondu. «¡A ver si os portáis meyor, coño!» — y ehí queda eso, qu’a la güela nun-y face falta más pa marcar l’orde del día.

Esti ye’l Númberu 3, ho. Setiembre y ensin vacaciones pa naide, que la política nun descansa nin en agostu. Tienlu equí en versión web y el fanzine enteru en PDF pa baxar.

¡Entama’l cursu políticu!

La Vieya apaez vestida de Santina, corona y too, y con un políticu agarráu en cada mano — el de la corbata roxa y el de la corbata azul, que pa esti cuentu da igual quién ye quién porque los dos berren igual cuando-yos tiren de la oreja. Al pie, la orden del día nun engaña: promeses, semeyes, ná de ná, ni un res.

Porque cada setiembre ye la mesma metanza: entamen el cursu políticu con cara de nuevu compromisu y acaba en payares con too igual que tuvo siempre. Esti añu la Vieya decidió que yá nun aguanta más y sal ella mesma a poner orde.

¡A ver si os portáis meyor! ¡Coño!

¿Qu’osties faémos equí?

La Vieya sigue agüeyando, y esti mes tocó-y mirar pa Salas: el Diariu d’Asturies anuncia que’l conceyu llogra 1.200 millones d’euros pa facer un «campus de datos». Nel dibuxu, dos paisanos miren pal campu con fiches de parchís coloraes, azules, verdes y marielles — porque nesti xuegu, quien reparte les fiches yá sabe quién gana.

Si quies el manifiestu enteru de la Vieya, tienlu en ¿Qu’osties faémos equí?.

N’aldea

Salas, 1.200 millones y un «campus de datos» que naide nel pueblu sabe bien qué ye. Mentanto, tres firmantes de corbata roblen papeles pa la cámara nel Diariu d’Asturies, y na aldea la xente sigue con la mesma entruga de siempre: ¿campus pa quién, y datos de quién?

El Consultoriu

Esti númberu trai dos cartes bien diferentes pa la sección de les xeres importantes: una futura mamá de Llanes que busca nome pa la guaḥa ensin caer en modes d’influencer, y un novio de Tapia Casariegu que quier dar una sorpresa inolvidable pa la boda (con perres de por medio, que too hai que dicilo).

Lléiles enteres nel Consultoriu La Vieya.

Asturies en curtiu

L’actualidá asturiana, pasada pel matamoscas:

• Adopta un Quirosanu. Tres l’éxitu de «Dog house» na TPA, agora quieren facer «Quirosanu house» pa que la xente de ciudá adopte una quirosana o quirosanu.
• ZP en Navelgas. Ehí lleva tol mes d’agostu batiendo en busca d’oru. Los vecinos de la zona yá tan asustaos poles ganes que-y tien esti paisanu de pañar oru.
• Nobel de la Paz n’Asturies. Esti añu propunxeron a dos gaiteros asturianos al Nobel de la Paz. Punsiéronse d’alcuerdu por fin, dempués d’años a tar a palos.
• Militares en Cabrales. L’exércitu español ta faciendo maniobres nel conceyu. Según informen, tan metiendo a los soldaos nes cueves del quesu durante selmanes ensin provisiones.

Tienes toa la última hora en ¡Última hora!.

---

Y hasta equí’l Númberu 3. Cursu políticu entamáu a gorrazu llimpiu, campus de datos ensin datos claros y la Vieya, como siempre, mirando pa too.